رجل فقير ..ماشى فى الشارع..لقى جوهرة شكلها رائع..
قال : اخيراً هبيعها واغتني وابقى من أصحاب الأموال.
راح موديها لحد بيشترى مجوهرات...فحصها..قاله دى فالصو !
الراجل الفقير ماصقدش وقاله انت كذاب وحرامى وعاوز تسرقها مني
سابه وراح لبياع تانى...قاله فالصو...فضل يشتم فيه زى اللى قبله..
مر على ٤ غيرهم...قاله له فالصو...ونالهم منه مانال من قبلهم !
لحد ما راح لواحد...توسم فيه انه رجل صالح...اداله الجوهرة وقاله كل ما اروح عند حد يفحصها يقولى فالصو..وانت الوحيد اللى هتقولى الحقيقة..فحصها.. قاله دى كنز..وجوهرة لا تقدر بثمن...
 |
الفقير : طب ماتشتريها منى..
قاله دى لا تقدر بثمن وماقدرش على ثمنها...دى اللى يقدر على ثمنها الملك... استنى لما يجى تعرضها عليه...واكيد هيشتريها منك..
قاله طب الملك هيجى امتى ؟
قاله ماعرفش مالوش مواعيد...
أنا ممكن اشغلك معايا هنا عامل واعلمك الصنعة دى وهديك فلوس كل يوم تكفيك انت وولادك ...ولما يجى الملك ابقى اعرضها عليه...
بعد شهور... الفقير اتعلم الصنعة...وبقى بنفسه يفحص اى جوهرة ويعرف إذا كانت حقيقية ولا فالصو...
جاء اليوم المنتظر...وجاء الملك...
جرى الراجل الفقير وجاب الجوهرة علشان يعرضها على الملك...
بس قبل مايعرضها...قال هفحصها أنا قبل ما اوريها للملك...
فحصها ....لقاها فالصو !!!
بنفسه اكتشف إنها فالصو..
طبعا مارضيش يوريها للملك....والملك مشى ...
رجع للراجل...قاله انا لقيتها فالصوا...ليه ماقلتليش كده !!
قاله...لو كنت قلتلك فالصو ..كنت شتمتنى زى اللى قبلى..
أنا عملت فيك معروف وعلمتك صنعة وبقيت بتكسب واكتشفت إنت بنفسك إنها فالصو !!..
غير كده كنت هتفضل عايش فى الوهم على طول ..ولا هتتعلم ولا هتتغير ومقتنع ان معاك جوهرة وهى فالصو !
.
فى ناس شايفين نفسهم جوهرة ...وهما فى الحقيقة فالصو..
انت لو ركزت مع نفسك...هتلاقى فى حاجات كتير فالصو..مش حقيقة..مزيف..مخدوع ..
هتعرف الفالصو من الحقيقى لما تحط نفسك فى بيئة تعلمك وتطورك وتاخد بايدك...هنا بداية الاكتشاف...
لازم كل واحد يكتشف ويعرف نفسه نقاط قوته ونقاط ضعفه ويطور من إمكانياته علشان يكون حقيقي مش فالصوا !
حط نفسك مع الناس دول اللى يعلموك ويطوروك..فتشوف نفسك بنفسك انك كنت قبلهم فالصو !
هتعرف حقيقتك بنفسك وتقدر تطورها
هتعرف حقيقه نفسك إن كنت ذو قيمه . ولا فالصو.
تعليقات
إرسال تعليق