وسط ترقب الجميع والجرى نحو الاوهام والضياع هناك احلام ضاعت وعمر ضاع واتسرق فى التفكير والتحليل بين ٦٤ مربع
لعبه الشطرنج سلاح ذو حدين ممكن تنجح فيها وتصل الى اعلى التقييمات وممكن تملكك وتاخد عقلك وتدمر حياتك وتسرق وقتك وعمرك
الوقوع في بئر الشطرنج مشكلة ولازم تهرب بسرعه منها لو تركت نفسك داخل البئر بتموت بالبطئ وتفلس أو تتجن .
ادمان الشطرنج(Chess addiction)
مشكلة كبيرة يسرق عمرك واموالك
هل انت رخيص لدرجة أن تضيع وقتك فى لعبه صعبه مش بتكسب اى حاجه غير وجع القلب والحقد والغل والكراهية وتجلب الفكر للإنسان مما يسبب له الأمراض .
عندما تنظر الى مدمنى الشطرنج الذين يجلسون على المقاهى ٢٤ ساعة للعب والتحليل ويذهبون من القهوه دى الى المقهى الأخرى هتلاقى ان مستواهم فى اللعب متوسط بالمقارنة مع كمية الوقت والعمر اللى ضيعوا فى تلك اللعبة ولكن السكينه سرقاهم ومش ح يخرجوا من الدوامة دى مثل السمك في المياه مينفعش يخرج لأن مخ وعقل الناس دى كله شطرنج افيال وحصنه وملك مخنوق وميعرفش حاجه فى الدنيا الا مجتمع الشطرنج والمقاهى ، ضيعوا كل عمرهم واحلى لحظات شبابهم فى تلك المصيدة وكل واحد منهم مفكر نفسه عبقري وجراند ماستر مينفعش حد يكسبه ولو حد كسبه فى المقهى او صاله اللعب لازم يعمل مشكلة او حوار او حجه للخسارة من كثر الغرور والفشل الذي تملكه بسبب تلك اللعبة .
وبالنظر إلى المتفوقين فى تلك اللعبة هتلاقيهم ١٠ أفراد على مستوى مصر كلها من بين ١٠٠مليون انسان واغلب الجراند ماستر فى هذه اللعبه الذين يحققوا بطولات ومكاسب منها هم في الحقيقة ناس مرتاحه ماديا ومش محتاجة لفلوس
وبالنظر إلى الفاشلون هم من اغلب الطبقات الفقيرة وجروا وراء تلك اللعبة بهدف جني المال وتحقيق دخل منها لكنه لا يقدر قيمة وقته ومجهوده ، مال ضائع على مجرد لعبه
النجاح في لعبة الشطرنج يتطلب عوامل كثيرة أهمها :-
الحالة المادية
لازم تكون امورك ميسره ومعاك فلوس تعرف تعيش منها وعندك دخل ثابت او بمعنى اخر لازم تكون مرتاح ماديا لا يهمك مكسب منها او خساره
السن
يعتبر السن عامل مهم فى تلك اللعبة كلما كان سنك صغير كلما كان قدرتك على الاستيعاب والتعلم اقوى
وجود مدربين
لازم تلجأ لمدرب يعلمك ويفهمك الافتتاحيات ووسط الدور والنهايات ويتابع معك اذا وجدك بعد سنه او اكثر مستواك لم يتقدم ومش فاهم اللعبه كويس لابد أن يمنعك عنها ولازم يقنعك انك لازم تبطل تلعبها لانك مش نافع فيها وتدور على لعبه اخرى او مجال تانى تلاقى نفسك فيه تعرف تتعامل معه لكن لا تترك نفسك وسط الفاشلين والضياع اهرب منها بسرعه
ذكاء اللاعب وقدرته على الاستيعاب وفهم المواقف بسرعه
القدرة على رؤية واضحة وعميقة للأمور
القدرة على تحليل المواقف واتخاذ القرار السليم
استغلال نقاط الضعف عند الخصم واللعب عليها
ادمان الشطرنج (Chess addiction) يدمر حياتك وصحتك ومالك اهرب بسرعه وفوق من الدوامة انها مجرد لعبه ومش هتوصل لحاجة الا وجع القلب والقرف
ابعد عنها واعرف ناس ، ابنى صدقات ،اتعلم اشياء وهوايات أخرى ، أخرج من تلك الدوامة الحياه مليانه حاجات كتيير ، لاتتعلق بشيء واحد انت مش بتكسب منه اى حاجه اعرف ده وده واتعلم دى ودى هتلاقى نفسك تفوقت في مجال آخر محتجالك وحتكسب منه
والخلاصة بالرغم من الفوائد التي تقدمها لعبة الشطرنج للبعض ، إلا أنها قد تشكل أضرار بالغة في حالة ممارستها بشكل مفرط ومتكرر Chess addiction
أضرار لعبة الشطرنج فى حالة ممارستها بشكل مفرط ومتكرر
الشعور بعدم الارتياح النفسى والندم على الوقت الذى ضاع بدون جدوى والشعور بهوس لعبة الشطرنج، مما يؤثر على الحياة الشخصية والمهنية.
إجهاد العين نتيجة التركيز الشديد.
فشل فى العمل وتراكم الدين والشعور باليأس
الأمراض نتيجة التفكير الكثير
إهمال المسؤوليات وإهمال الحياة الأسرية ، مما يزيد من مشاكل العمل أو الدراسة.
الشعور بالتوتر والقلق، خاصة للمبتدئين.
المعاناة من صعوبة النوم بعد ممارسة اللعبة بسبب التفكير المستمر.
آلام الظهر والرقبة نتيجة الجلوس لفترات طويلة.
ضياع الاموال بدون جدوى والافلاس .
اهدار الوقت وعدم النوم السليم نتيجه للسهر فى المقاهى ولعب الشطرنج
اهرب بسرعة من مسلسل الضياع ده بدل ما ترجع تبكي وتندم شعرك يشيب وتصبح نموذج فاشل عايش على الصدقه والتطفل والسبيل .
.
تعليقات
إرسال تعليق